JIDE KORTINI

HUKU sakata lake na Kituo cha Redio Clouds FM likiendelea kushika kasi, habari ya mjini ni kwamba inadaiwa mwanamuziki Judith Wambura Mbibo ‘Lady Jaydee’ leo anatarajia kufikishwa Mahakama ya Kinondoni, Dar bila kutajwa aina ya mashitaka yanayomkabili.

Judith Wambura Mbibo ‘Lady Jaydee’.

Taarifa za mwanadada huyo kufikishwa mahakamani hapo, ziliibuka chinichini kwenye mitandao ya kijamii, mwishoni mwa wiki iliyopita ambapo baadaye Lady Jaydee alihoji kuwa pengine yeye ndiye anayestahili ‘kukinukisha’ kwa kuwapeleka mahakamani wasanii walio chini ya Tanzania House of Talent (THT), Estarlina Sanga ‘Linah’ na Elias Barnaba ambao anadai aliwalipa kianzio cha shoo yake ya Mei 31, mwaka huu kisha kumchomolea dakika za mwisho.
“Hivi mahakamani sitakiwi kwenda mimi ambaye wasanii wao wamechukua advance na kuafiki mbele ya camera na wakanipa, It wasn’t me?” aliandika Lady Jaydee katika mtandao wa Twitter.

Estarlina Sanga ‘Linah’.

KUMBUKUMBU
Kumbukumbu inaonesha, miongoni mwa maneno ambayo yanadaiwa kuwa yaliuchafua uongozi wa Clouds ni yale ambayo Lady Jaydee aliyaandika kupitia blogu yake hivi karibuni.
RUGE HAKUKAA KIMYA
Hata hivyo, siku chache baada ya Lady Jaydee kuandika wosia huo mzito, Mkurugenzi wa Vipindi na Utafiti wa Clouds Media Group, Ruge Mutahaba alitumia Kipindi cha Power Breakfast kuzipangua hoja moja baada ya nyingine na mwishoni kumalizia kwa kusema Jide anapaswa kusoma alama za nyakati kwani umri unakwenda na muziki anapaswa kujipanga vizuri ili uweze kujimudu pindi zamu ya kushuka kwenye gemu inapofika.
Ijumaa Wikienda ilifanya jitihada za kumtafuta Lady Jaydee azungumzie kuhusiana na ishu ya kufikishwa kortini hiyo lakini hakuweza kupatikana lakini kupitia akaunti yake ya mtandao wa Twitter, alifafanua kauli hizo:
“Nimepata taarifa zisizo rasmi kuwa nimefunguliwa kesi mahakamani, natumaini sitaitwa kizimbani tar. 31 May ambayo ndiyo siku ya show.”

Elias Barnaba.

Baadaye aliongeza: “Ratiba ya usiku wa leo (Ijumaa) ni Machozi Band kama kawaida, ila ratiba ya Jumatatu (leo) natakiwa Mahakama ya Kinondoni. Taarifa zaidi zitafuata nikijua kinachoendelea. Ila kwa leo mje tuburudike Nyumbani Lounge mpaka asubuhi.”
Hadi tunakwenda mitamboni, mwanamuziki huyo anayetarajia kuzindua albamu yake ya Nothing But The Truth, Mei 31, mwaka huu, alinukuliwa kuwa aliinadi shoo yake ya kila wikiendi huku akibainisha kuwa anajiandaa kwenda mahakamani Jumatatu (leo).